هي "أسماء سعيد" بنت دار الأوبرا المصرية (سوليست) بفرقة "سليم سحاب"، انضمت إلى فرقة نجوم الأوبرا، وشاركت في العديد من الحفلات والمناسبات الرسمية وتبناها المنتج "نصر محروس" لكن هل تصبح بديلة لـ"شيرين"؟... إنها المطربة "سوما".
كيف تم لقاؤك بالمنتج "نصر محروس" واقتناعه بك؟
الموسيقار الراحل "حسن أبو السعود" هو اللي عرفني به، وقال لي عايز أسمع صوتك فغنيت أغنية "صبران" لـ"فايزة أحمد"، أعجب بصوتي وبعد حوالي شهر اتصل بي ومضى عقد معايا و"نصر محروس" كان بيبحث عن صوت حلو يحقق منه نجاح فني وتجاري في نفس الوقت وهو من المنتجين اللي بيهتم جدا بالصوت وليس أي شيء آخر.
"نصر محروس" اختار لك اسم "سوما"... هل ماخفتيش من المقارنة باسم كوكب الشرق "أم كلثوم"؟
أنا كنت قلقانة في الأول لكن وجدنا إنه اسم قريب لاسمي الحقيقي "أسماء" ومستحيل المقارنة بأي شكل من الأشكال بالسيدة "أم كلثوم".
بعد كده ظهرت "سومة التونسية" هل ده ضايقك بسبب الخلط عند الجمهور؟
أنا ظهرت من قبل "سومة التونسية" لكن اللي مضايقني إن الناس فاكرة إني مش مصرية لكن الجمهور بقى عنده وعي ويقدر يميز الأصوات والأسماء وأنا مش خايفة من الزحمة.
الدويتو مع "بهاء سلطان" حقق لك شهرة كبيرة هل الشكل ده بقى قريب من الناس؟
أنا بحب الدويتو من أيام الأوبرا ولما قدمته مع "بهاء" ماكنش فيه دويتو على الساحة والفكرة اتقدمت بشكل كويس من كلام ولحن وتصوير، وأي مطرب دلوقت بيحب يعمل دويتو بدليل "إيهاب توفيق" و"مدحت صالح هيعملوا" دويتو مع بعض.
هل "سوما" قادرة على الدخول في منافسة مع "إليسا" و"نانسي عجرم" و"هيفاء"؟
أنا عايزة أنافس نفسي وعايزة أقدم أغاني متميزة عنهم وأنا بحب "نانسي بشقاوتها" و"إليسا" بإحساسها لكن "هيفاء" روحها فقط.
أغنيتك (ماقدرش أقول) أغنية فيلم "90 دقيقة" نجحت.. هل أغاني الأفلام بتنجح لأن كلماتها بتكون مكتوبة كويس؟
أغنية الفيلم أصبحت نوعا من أنواع الدعاية للفيلم وتحكي قصة الفيلم والناس بتحب الفيلم من الأغنية علشان كده بتعلق معاهم ونفسي أقدم تاني أغاني في الأفلام.
هل فعلا أغنية "حتروح" بتعبر عن تجربة شخصية في حياتك؟
أنا صحيح مريت بتجربة حب وفشلت لكن نسيت الموضوع وأعتقد أن كلمات الأغنية حالة كل إنسان في الدنيا مر بها.
أغنية "ثلاث أيام "علقت مع الناس أكثر من أغنية حتروح؟
أنا انبهرت بالأغنية والناس حبتها لأن كلماتها مختلفة والناس علقت على كلمة "آسف يا حبيبي" وأنا مش شايفة فيها حاجة لأن الولد أحيانا بيقول لحبيبته يا حبيبي وأنا قلت لـ"نصر محروس" يغير الكلمة رفض وقال الشباب بيقولوا كده واحنا عايزين نقرب منهم.
هل ممكن صوت "سوما" يقدم اللون الشعبي القريب من الناس الآن؟
هو الشعبي مطلوب وناجح بس كل واحد يقدم الشكل والأسلوب المناسب ليه وأنا حاسة إن الشعبي مش مناسب لي.
يقال إن فيه نوع من القيود والاحتكار مع "نصر محروس"؟
أنا رأيي إن المنتج لازم يحتكر الفنان لأن هو اللي بيصنعه و"نصر محروس" قدم "تامر حسني" و"شيرين" و"بهاء سلطان" في أحسن صورة والفكرة دي انتشرت بعد خلافاته مع "شيرين" موخرا.
يقال إنك بديلة "شيرين" و"نصر محروس" بيحارب "شيرين" بـ"سوما"؟
الموضوع ده مضايقني جدا وكنت أحب الناس تسمعني من غير مقارنة لكن ألبومي نزل في وقت الخلافات لكن "شيرين" مطربة مهمة وأنا من عشاق "شيرين" وعلاقتي بيها كويسة جدا وباركت لي على الألبوم والكليب و"نصر محروس" منتج بينتج أصوات جديدة باستمرار وبيجهز حاليا لتقديم "دنيا" هل معنى كده إنه هيحارب "سوما" بـ"دنيا".
تردد أن فيه خلافات بينك وبين زملائك في الأوبرا أو غيرة فنية؟
مفيش أي خلافات لحد دلوقت، أنا بروح الأوبرا وعلى اتصال بهم وهما بيحبوني وبحبهم ومسألة الغيرة الله أعلم بيها.
سمعنا إنك هتشاركي في فيلم سينمائي هل هي خطوة محسوبة؟
لما قرأت السيناريو أعجبت به جدا وأنا بشترك في دروس تمثيل علشان أظهر بشكل كويس والفيلم بطولة "تامر حسني" و"هيثم شاكر" وإخراج "نصر محروس".
ظهرت في الفترة الأخيرة بـ"نيو لوك" جديد، عملتِ إيه؟
مارست الرياضة وعملت ريجيم قاسي وأهم حاجة بحافظ على الأكل وأختار اللبس والمكياج اللي يناسبني.
هل ممكن الفن يؤثر على حياتك الشخصية؟
أنا زي أي بنت بحلم أن أكون أما وأتزوج لكن أنا بعيش كل مرحلة بظروفها وعندما أقابل اللي أحبه لن أتردد في موضوع الارتباط لأن الفن بيسرق العمر
موضوع: سوما : "أنا بنافس نفسي" 
السبت 12 مايو - 16:02
